Covid-19 ၏ သက်ရောက်မှုကြောင့် ထိခိုက်နစ်နာမှုရှိသည့် စီးပွားရေးလုပ်ငန်းများကို အစိုးရက ကျပ် ဘီလီယံ (၁၀၀) ထုတ်ချေးပေးမည်ဟု ကြေညာပြီးနောက်တွင် တတိယအသုတ်အဖြစ် လုပ်ငန်း (၁၁၁) ခုကို ကျပ် ၃ ဒဿမ ၅၄၆၆ ဘီလီယံထုတ်ချေးထားကြောင်း ကုန်သည်စက်မှုအသင်းချုပ်ထံမှ သိရသည်။
အဆိုပါ ချေးငွေထုတ်ချေးခြင်းကို ကုန်သည်စက်မှုအသင်းချုပ်မှ ဦးဆောင်၍ ချေးငွေလျှောက်ထားခြင်းကို ဧပြီ ၉ ရက်အထိ နောက်ဆုံးထားလျှောက်ထားခွင့်ပြုခဲ့သည်။
ယခု ထုတ်ချေးသည့် လုပ်ငန်း (၁၁၁) ခုအပြင် ချေးငွေလျှောက်ထားသည့်လုပ်ငန်းများကျန်ရှိနေသေးပြီး အဆိုပါလုပ်ငန်းများ၏ချေးငွေလျှောက်ထားခွင့်ကို ဘဏ်လုပ်ထုံးလုပ်နည်းများနှင့်အညီ မြန်မာ့စီးပွားရေးဘဏ်မှ စိစစ်၍ ချေးငွေထုတ်ချေးပေးနေကြောင်း ကုန်သည်စက်မှုအသင်းချုပ်ထံမှ သိရသည်။
အဆိုပါ အစိုးရ၏ စီးပွားရေးပြန်လည်ထူထောင်ရေး Covid-19 fund ထဲမှ ပထမအသုတ်အဖြစ် ချေးငွေ ကျပ် ၆ ဘီလီယံခန့်ထုတ်ချေးခဲ့ပြီး ဒုတိယအသုတ်တွင် ထုတ်ချေးထားသည့် ငွေကြေးပမာဏအား ကုန်သည်စက်မှုအသင်းချုပ်မှ ပြောကြားခြင်းမရှိပေ။
ယင်းသို့ ချေးငွေလျှောက်ထားရာတွင် Covid-19 ၏ အကျိုးသက်ရောက်မှုအများဆုံးဖြစ်သည့် လုပ်ငန်းများကို ထုတ်ချေးမည်ဖြစ်ပြီး အတိုးနှုန်းမှာ ၁ ရာခိုင်နှုန်းသတ်မှတ်ထားကာ ချေးငွေသတ်တမ်းမှာ တစ်နှစ်ကြာမြင့်မည်ဖြစ်သည်။
အဆိုပါ ချေးငွေကို အွန်လိုင်းဖြင့်လည်း လျှောက်ထားနိုင်ပြီး အွန်လိုင်းမှ ချေးငွေလျှောက်ထားခြင်းကို ဧပြီ ၂ ရက်မှ စတင်လျှောက်ထားခွင့်ပြုခဲ့သည်။
ယင်းချေးငွေကို CMP လုပ်ငန်းများ၊ဟိုတယ်နှင့် ခရီးသွားလုပ်ငန်းများ၊အထည်ချုပ်လုပ်ငန်းများနှင့် SME လုပ်ငန်းများကို ထုတ်ချေးပေးသားမည်ဖြစ်သည်။
